Logo
2019 ඔක්තෝම්බර් මස 19 වැනි සෙනසුරාදා

දිනූ ජය රැකගන්න සජිත් ජනපති කරන්න -රනිල්ගෙන් ඉල්ලීමක්



පසුගිය වසර පහ තුළ විනිවිද පෙනෙන පාලනයක් ඔස්සේ සිදුකරන ලද ප්‍රතිසංස්කරණ ක්‍රියාවලිය තවදුරටත් තහවුරු කරමින් ඉදිරියට ගෙන යාම සඳහා ඉදිරි ජනාධිපතිවරණයේදී සජිත් ප්‍රේමදාස මහතා ජයග්‍රහණය කරවන ලෙස අග්‍රාමාත්‍ය රනිල් වික්‍රමසිංහ මහතා පවසයි.

ඉන් පසුව පැවැත්වෙන පාර්ලිමේන්තු මැතිවරණයේදී එක්සත් ජාතික පෙරමුණට බහුතර බලයක් ලබා දෙන ලෙසත් ඉල්ලා සිටි අග්‍රාමාත්‍ය රනිල් වික්‍රමසිංහ මහතා, ඒ ඔස්සේ ව්‍යවස්ථාව ඇතුළු සියලූ ප්‍රතිසංස්කරණයන් සිදුකරමින් ශ්‍රී ලංකාව ආසියාවේ ඉහළ ම හා යහපත් රාජ්‍යයක් ලෙස ඔසවා තැබීමට තමන් කැපවී ක්‍රියා කරන බව පැවසීය.

ඒ මහතා මේ අදහස් පළ කළේ අද (09) දින සිවිල් සමාජ හා වෘත්තීය සමිති එකමුතුව සංවිධානය කළ සමුළුව අමතමිනි. 

මෙහිදී සිවිල් සමාජහා වෘත්තීය සමිති එකමුතුව විසින් අග්‍රාමාත්‍ය රනිල් වික්‍රමසිංහ මහතා වෙත සිවිල් සමාජ ප්‍රතිපත්ති ප්‍රතිසංස්කරණ යෝජනාවලිය පිළිගන්වන ලදී. 

එහිදී අදහස් දක්වමින් අග්‍රාමාත්‍යවරයා තවදුරටත් ප්‍රකාශ කළේ මිනිස් ජීවිත ආරක්‍ෂා කරමින්, නිදහස අර්ථවත් වූ සමාජ ක්‍රමයක් යහපාලන රජය යටතේ නිර්මාණය කළ බවය.

එසේම කිසිවෙකුගේ ජීවිත විනාශ නොකර සියලු දෙනාගේ ජීවිත ආරක්ෂා කළ බවත් මාධ්‍ය නිදහස හා අධිකරණයේ ස්වාදීනත්වය තහවුරු කළ බවත් අග්‍රාමාත්‍යවරයා ප්‍රකාශ කළේය.

එක්සත් ජාතික පෙරමුණේ ජනාධිපති අපේක්‍ෂක නිවාස ඉදිකිරීම හා සංස්කෘතික කටයුතු අමාත්‍ය සජිත් ප්‍රේමදාසමහතා පැවසූයේ නිදහස නොමැති යුගයකට රට ගෙන යාම යළි ඉඩ දිය නොහැකි බවයි. 

දිනූ නිදහස තහවුරු කිරීමටත්, ශක්තිමත් කිරීමටත් එක්සත් ජාතික පෙරමුණ කැපවී සිටින බව පැවසූ ප්‍රේමදාස මහතා ආරම්භ කළ ප්‍රතිසංස්කරණක්‍රියාවලිය තව තවත් ඉදිරියට ගෙන යාම තමන්ගේ අරමුණ බවද අවධාරණය කළේය.






Helabima. All rights Reserved.

Copyrights protected: All the content on this website is copyright protected and can be reproduced only by giving due courtesy to 'helabima'