Logo
2019 සැප්තැම්බර් මස 18 වැනි බදාදා

ඇවන්ගාඩ් නඩුවෙන් ගෝඨා නිදොස් කොට නිදහස්



ඇවන්ගාඩ් සමාගමට පාවෙන අවි ගබඩාවක් පවත්වාගෙන යාමට ඉඩ දී රජයට රුපියල් කෝටි 1140 ක පාඩුවක් කළැයි චෝදනා කරමින් අල්ලස් හෝ දූෂණ චෝදනා විමර්ශන කොමිෂන් සභාව පවරා තිබූ නඩුවේ චෝදනාවලින් හිටපු ආරක්ෂක ලේකම් ගෝඨාභය රාජපක්ෂ මහතා ඇතුළු අටදෙනා නිදහස් කිරීමට අභියාචනාධිකරණය අද නියෝග කළේය.

විත්තිකාර පාර්ශ්වයෙන් ගොනුකෙරුණු අභියාචනා පෙත්සම සම්බන්ධයෙන් මෙම තීන්දුව ප්‍රකාශයට පත් කෙරුණේ අචල වෙන්ගප්පුලි සහ අර්ජුන ඔබේසේකර යන විනිසුරු මඬුල්ල විසින්.

ගෝඨාභය රාජපක්ෂ මහතා අභියාචනාධිකරණයේ ගොනු කළ පෙත්සම මගින් සඳහන් කර තිබුණේ ඇවන්ගාඩ් සමාගමට පාවෙන අවි ගබඩාවක් පවත්වාගෙන යාමට අනුමැතිය දීම තුළින් රජයට රුපියල් කෝටි 1140ක පාඩුවක් සිදු කළැයි චෝදනා කරමින් අල්ලස් කොමිසම තමා ඇතුළු විත්තිකරුවන් අටකට එරෙහිව කොළඹ මහේස්ත්‍රාත් අධිකරණය හමුවේ නඩුවක් ගොනු කර ඇති බවයි.

එම කොමිසම නඩුව ගොනු කර තිබෙන්නේ එහි කොමසාරිස්වරුන්ගේ ලිඛිත අවසරයකින් තොරව බැවින් එය නීතිවිරෝධී බව සඳහන් කරමින් තම නීතිඥවරු මූලික විරෝධතාවක් මතු කළත් එම මූලික විරෝධතා ප්‍රතික්ෂේප කොට නඩුව ඉදිරියට ගෙන යාමට කොළඹ මහේස්ත්‍රාත් අධිකරණය තීන්දු කළ බව ගෝඨාභය රාජපක්ෂ මහතා පෙත්සමින් සඳහන් කර තිබුණි.

කොළඹ මහේස්ත්‍රාත් අධිකරණයේ එම තීන්දුව නීතිවිරෝධී බවට ප්‍රකාශ කොට තමා එම චෝදනා වලින් නිදහස් කරන ලෙස ඉල්ලා කොළඹ මහාධිකරණය වෙත ප්‍රතිශෝධන පෙත්සමක් ඉදිරිපත් කළද එයද ප්‍රතික්ෂේප කිරීමට කොළඹ මහාධිකරණය තීන්දු කළ බවයි පෙත්සමින් වැඩිදුරටත් කියා තිබුණේ.

කරුණු සලකා බැලූ අභියාචනාධිකරණය, කොළඹ මහේස්ත්‍රාත් අධිකරණ නියෝගය සහ එම නියෝගයට එරෙහි ප්‍රතිශෝධන අයදුම්පත ප්‍රතික්ෂේප කිරීමට කොළඹ මහාධිකරණය දුන් නියෝගයද අත්හිටුවනු ලැබුවේය.

මේ අතර ප්‍රමාණවත් සාක්ෂි ඇත්නම් එම සැකකරුවන්ට එරෙහිව එකී චෝදනා යටතේ විධිමත් ආකාරයෙන් නඩු පැවරීමේ අයිතිය අල්ලස් කොමිසමට හිමි බවද විනිසුරු මඬුල්ල නියෝගය නිකුත් කරමින් සඳහන් කළේය.







Helabima. All rights Reserved.

Copyrights protected: All the content on this website is copyright protected and can be reproduced only by giving due courtesy to 'helabima'